نگاہ مختصر سے داستاں تک بات جا پہنچی

نگاہ مختصر سے داستاں تک بات جا پہنچی

خدا جانے کہاں سے اب کہاں تک بات جا پہنچی

نگاہوں کی زباں نے کہہ دیا جو کچھ نہ کہنا تھا

دل سوزاں سے جب اشک رواں تک بات جا پہنچی

سنور اٹھی ہے کیا زلف زمیں اب دست انساں سے

کہ ماہ و مشتری و آسماں تک بات جا پہنچی

ہوا تو فیصلہ دل کا اشاروں میں کنائیں میں

کہاں وہ لطف جب لفظ بیاں تک بات جا پہنچی

بلا سے ساز دل ٹوٹے صدا لیکن نہ پیدا ہو

ہوئی رسوا محبت جب فغاں تک بات جا پہنچی

گئی شاید جوانی اور گیا انداز جرأت بھی

کہ اب اندیشۂ سود زیاں تک بات جا پہنچی

کبھی گلشن میں اپنا بھی نشیمن تھا چمن والو

خدا جانے یہ کیوں برق تپاں تک بات جا پہنچی

نظر بے باک دل بے باک کیا پروا حبیبؔ اس کی

یہاں تک بات جا پہنچی وہاں تک بات جا پہنچی

nigah mukhtasar se dastan tak bat ja pahunchi

khuda jane kahan se ab kahan tak bat ja pahunchi

nigahon ki zaban ne kah diya jo kuchh na kahna tha

dil-e-sozan se jab ashk-e-rawan tak bat ja pahunchi

sanwar uthi hai kya zulf zamin ab dast-e-insan se

ke mah-o-mushtari-o-asman tak bat ja pahunchi

hawa to faisla dil ka isharon mein kannaen mein

kahan wo lutf jab lafz bayan tak bat ja pahunchi

bala se saz-e-dil tute sada lekin na paida ho

hui ruswa mohabbat jab fughan tak bat ja pahunchi

gai shayad jawani aur gaya andaz-e-jurat bhi

ke ab andesha-e-sud ziyan tak bat ja pahunchi

kabhi gulshan mein apna bhi nasheman tha chaman walo

khuda jane ye kyun barq-e-tapan tak bat ja pahunchi

nazar be bak dil be bak kya parwa habib us ki

yahan tak bat ja pahunchi wahan tak bat ja pahunchi