چمن چمن سے گلوں کا یہی پیام آیا

چمن چمن سے گلوں کا یہی پیام آیا

وہی حسیں ہے جو دنیا میں شاد کام آیا

مری طرف کو اٹھی یوں نگاہ ساقی کی

کہ جیسے دور میں لبریز مے کا جام آیا

خود ان کے رخ سے ہوا ان کے دل کا حال عیاں

جو بھولے بسرے کبھی لب پہ میرا نام آیا

بڑھا کے ہاتھ زمانے نے اس سے چھین لیا

جو ایک لہجہ بھی لب تک کسی کے جام آیا

صدائے پیر مغاں تھی یہ بزم رنداں میں

ہے اس کا میکدہ قبضے میں جس کے جام آیا

حریم ناز سے آ تو گیا ہوں میں لیکن

پکارتا ہوا کوئی ہر ایک گام آیا

میں گم ہی تھا ابھی تاریکیوں میں ماضی کی

کہ صبح نو کی کرن کا مجھے سلام آیا

خیال یار کی مد ہوشیاں معاذ اللہ

مری نظر نہ اٹھی جب وہ سوئے بام آیا

خرد کی ساری گئی پختہ کاریاں بے کار

بس ایک شوق کا سودائے خام کام آیا

حبیبؔ داد سخن مل گئی مجھے اس روز

پسند طبع جب ان کو مرا کلام آیا

chaman chaman se gulon ka yahi payam aya

wahi hasin hai jo duniya mein shad kam aya

miri taraf ko uthi yun nigah saqi ki

ke jaise daur mein labrez mai ka jam aya

khud un ke rukh se hua un ke dil ka hal ayan

jo bhule basre kabhi lab pe mera nam aya

barha ke hath zamane ne us se chhin liya

jo ek lahja bhi lab tak kisi ke jam aya

sada-e-pir-e-mughan thi ye bazm-e-rindan mein

hai us ka maikada qabze mein jis ke jam aya

harim-e-naz se a to gaya hun main lekin

pukarta hua koi har ek gam aya

main gum hi tha abhi tarikiyon mein mazi ki

ke subh-e-nau ki kiran ka mujhe salam aya

khayal-e-yar ki mad hoshiyan maaz allah

miri nazar na uthi jab wo su-e-bam aya

khirad ki sari gai pukhta kariyan be kar

bas ek shauq ka sauda-e-kham kam aya

habib dad-e-sukhan mil gai mujhe us roz

pasand taba jab un ko mira kalam aya