تجھے اپنی فضاؤں پر پشیماں کون دیکھے گا

تجھے اپنی فضاؤں پر پشیماں کون دیکھے گا

ترا غم سہ کے بھی تجھ کو پریشاں کون دیکھے گا

نہ آئیں وہ نظر اندر تو باہر کی طرف دیکھوں

تصور ہے تو پھر تصویر جاناں کون دیکھے گا

کسی کے نور کی جب دیدہ و دل میں تجلی ہے

تو پھر بزم جہاں کے اب چراغاں کون دیکھے گا

سنے گا کون اس شور جہاں میں دھڑکنیں دل کی

مرا بھیگا ہوا اشکوں سے داماں کون دیکھے گا

جہاں صبح وطن جاتی ہے رنگ و نور برساتی

وہاں بے کیف سی شام غریباں کون دیکھے گا

ترے در پر جمی ہے ہر پریشاں حال کی نظریں

نہ تو دیکھے تو پھر حال پریشاں کون دیکھے گا

جہاں نے صرف یہ دیکھا کہ ساحل پر سلامت ہوں

اٹھا ہے جو مرے سینے میں طوفاں کون دیکھے گا

حبیبؔ آنکھوں کو اپنی بند کر کے ہی چلیں ورنہ

سر بازار بکتا خون انساں کون دیکھے گا

tujhe apni fazaon par pasheman kaun dekhega

tira gham sah ke bhi tujh ko pareshan kaun dekhega

na aen wo nazar andar to bahar ki taraf dekhun

tasawwur hai to phir taswir janan kaun dekhega

kisi ke nur ki jab dida-o-dil mein tajalli hai

to phir bazm-e-jahan ke ab charaghan kaun dekhega

sunega kaun is shor-e-jahan mein dharkanen dil ki

mira bhiga hua ashkon se daman kaun dekhega

jahan subh-e-watan jati hai rang-o-nur-e-barsati

wahan be kaif si sham-e-ghariban kaun dekhega

tire dar par jami hai har pareshan hal ki nazren

na to dekhe to phir hal-e-pareshan kaun dekhega

jahan ne sirf ye dekha ke sahil par salamat hun

utha hai jo mire sine mein tufan kaun dekhega

habib ankhon ko apni band kar ke hi chalen warna

sar-e-bazar bikta khun-e-insan kaun dekhega