لہجے کو پھول لفظ کو جگنو اگر کریں

لہجے کو پھول لفظ کو جگنو اگر کریں

وقت رواں کے ساتھ معانی سفر کریں

اندر کی بارشوں نے جو منظر دکھائے ہیں

باہر کی دھوپ‌ چھاؤں کو اس کی خبر کریں

موسم پرندے دھوپ کی دیوار شب چراغ

قصہ طویل ہونے لگا مختصر کریں

اب نیند سی ہے نیند نہ اب خواب سا ہے خواب

سڑکوں پہ جاگ جاگ کے عمریں بسر کریں

منظر کو درمیان سے اپنے ہٹا کے دیکھ

ممکن ہے پھر متینؔ کی باتیں اثر کریں

lahje ko phul lafz ko jugnu agar karen

waqt-e-rawan ke sath maani safar karen

andar ki barishon ne jo manzar dikhae hain

bahar ki dhup chhaon ko us ki khabar karen

mausam parinde dhup ki diwar shab charagh

qissa tawil hone laga mukhtasar karen

ab nind si hai nind na ab khwab sa hai khwab

sarkon pe jag jag ke umren basar karen

manzar ko darmiyan se apne hata ke dekh

mumkin hai phir matin ki baten asar karen