حسین خواب نہیں کوئی زندگی کی طرح

حسین خواب نہیں کوئی زندگی کی طرح

کوئی سراب جہاں میں نہیں خوشی کی طرح

فضا میں تیرے تبسم نے بجلیاں بھر دیں

چمک اٹھے ہیں اندھیرے بھی روشنی کی طرح

شب فراق کے بڑھتے ہوئے اندھیروں میں

تم آ گئے مرے آنگن میں چاندنی کی طرح

نسیم صبح کی شبنم کی فرحتیں لے کر

تم آئے میرے تصور میں تازگی کی طرح

ہے آرزو سے تری زندگی مری رقصاں

ہے دل میں پیار ترا روح نغمگی کی طرح

وہی ہے شوق کا جذبہ وہی ہے عز و نیاز

کہ دیکھ لینا بھی تم کو ہے بندگی کی طرح

مجھے پسند ہے ہنگامۂ جہاں واعظ

یہ زندگی نہیں جنت کی بے حسی کی طرح

کبھی وہ آگ کبھی آ کے پھول برسائیں

وہ بھولی بسری سی یادیں ہیں زندگی کی طرح

الجھنا خاروں سے ہو سامنا جو طوفاں سے

رہو جہاں میں اگر شادماں کلی کی طرح

حبیبؔ اپنی غزل میں بھی ہو وہ سوز و گداز

جو دل کو موہ لے کانہا کی بانسری کی طرح

hasin khwab nahin koi zindagi ki tarah

koi sarab-e-jahan mein nahin khushi ki tarah

faza mein tere tabassum ne bijliyan bhar den

chamak uthe hain andhere bhi raushni ki tarah

shab-e-firaq ke barhte hue andheron mein

tum a gae mire angan mein chandni ki tarah

nasim-e-subh ki shabnam ki farhaten le kar

tum ae mere tasawwur mein tazgi ki tarah

hai arzu se tiri zindagi miri raqsan

hai dil mein pyar tira ruh naghmagi ki tarah

wahi hai shauq ka jazba wahi hai izz-o-niyaz

ke dekh lena bhi tum ko hai bandagi ki tarah

mujhe pasand hai hangama-e-jahan waiz

ye zindagi nahin jannat ki be hissi ki tarah

kabhi wo ag kabhi a ke phul barsaen

wo bhuli bisri si yaden hain zindagi ki tarah

ulajhna kharon se ho samna jo tufan se

raho jahan mein agar shadman kali ki tarah

habib apni ghazal mein bhi ho wo soz-o-gudaz

jo dil ko moh le kanha ki bansuri ki tarah