اک لمحۂ وصال سے آگے نکل گئی

اک لمحۂ وصال سے آگے نکل گئی

میں خواہشوں کے جال سے آگے نکل گئی

چہرے پہ اس کے رنج کے آثار دیکھ کر

چپ چاپ ہر سوال سے آگے نکل گئی

کچھ میں بھی نا شناس تھی اس کار خیر میں

ہر رنج ہر ملال سے آگے نکل گئی

ایسے غم حیات نے بانہوں میں لے لیا

میں اپنی دیکھ بھال سے آگے نکل گئی

کچھ دن ترے وصال نے مدہوش کر دیا

میں خواہش مآل سے آگے نکل گئی

تو بھی مرے وجود سے آزاد ہو گیا

میں بھی ترے خیال سے آگے نکل گئی

ik lamha-e-wisal se age nikal gai

main khwahishon ke jal se age nikal gai

chehre pe us ke ranj ke asar dekh kar

chup chap har sawal se age nikal gai

kuchh main bhi na shanas thi is kar-e-khair mein

har ranj har malal se age nikal gai

aise gham-e-hayat ne banhon mein le liya

main apni dekh bhal se age nikal gai

kuchh din tire wisal ne madhosh kar diya

main khwahish-e-maal se age nikal gai

tu bhi mire wajud se azad ho gaya

main bhi tire khayal se age nikal gai