ازل سے بادۂ ہستی کی ارزانی نہیں جاتی

ازل سے بادۂ ہستی کی ارزانی نہیں جاتی

اس ارزانی پہ بھی اس کی فراوانی نہیں جاتی

ہجوم رنج و غم نے اس قدر مجھ کو رلایا ہے

کہ اب راحت کی صورت مجھ سے پہچانی نہیں جاتی

ہوئی تھی اک خطا سرزد سو اس کو مدتیں گزریں

مگر اب تک مرے دل سے پشیمانی نہیں جاتی

چمن زار تمنا کا فقط اک پھول مرجھایا

اسی دن سے مرے گلشن کی ویرانی نہیں جاتی

مرے اشکوں سے کیا نسبت تمہیں اے انجم گردوں

کہ ان کی روز روشن میں بھی تابانی نہیں جاتی

مری وحشت میں شاید آ چلے انداز رعنائی

کہ زلفوں کی طرح دل کی پریشانی نہیں جاتی

azal se bada-e-hasti ki arzani nahin jati

is arzani pe bhi us ki farawani nahin jati

hujum-e-ranj-o-gham ne is qadar mujh ko rulaya hai

ke ab rahat ki surat mujh se pahchani nahin jati

hui thi ik khata sarzad so us ko muddaten guzren

magar ab tak mire dil se pashemani nahin jati

chaman zar-e-tamanna ka faqat ik phul murjhaya

usi din se mire gulshan ki wirani nahin jati

mire ashkon se kya nisbat tumhen ai anjum-e-gardun

ke un ki roz-e-raushan mein bhi tabani nahin jati

miri wahshat mein shayad a chale andaz-e-raanai

ke zulfon ki tarah dil ki pareshani nahin jati