Arooz is now on the App Store, for iPhone and iPad. Download →

All poetry

تو بھی وہاں نہیں محبت جہاں نہیں

Jagdish Sahay Saxena

تو بھی وہاں نہیں محبت جہاں نہیں

ہر آستان حسن ترا آستاں نہیں

الفت کی تھیں دلیل تری بدگمانیاں

اب بد گمان میں ہوں کہ تو بدگماں نہیں

دل کش ہے گلستاں بھی ترے حسن کی طرح

لیکن تری ادا کی طرح دل ستاں نہیں

نعمت ملی ہے تم کو جوانی کی دوستو

افسوس ہے کہ عزم تمہارا جواں نہیں

کیونکر کہوں کہ لوگ ہیں سوئے عدم رواں

اس کارواں میں گرد پس کارواں نہیں

ہے بے نیاز شادی و غم میری بے خودی

یہ وہ چمن ہے جس میں بہار و خزاں نہیں

نادم مرا سکوت کہ ہے قلب سوگوار

دنیا سمجھ رہی ہے خموشی فغاں نہیں