تائب نہیں ہوں بے خود و سرشار بھی نہیں

تائب نہیں ہوں بے خود و سرشار بھی نہیں

جو اس طرح پیے وہ گنہ گار بھی نہیں

زندان رنگ و بو میں گزاری ہے عمر یوں

آزاد بھی نہیں ہوں گرفتار بھی نہیں

اتنی سی بات ہے وہ تغافل شعار ہے

گر مہرباں نہیں تو ستم گار بھی نہیں

کیا پوچھتے ہو عاشق بیدل کی آرزو

جب دل نہیں تو حسرت دیدار بھی نہیں

بولے کہ تم کو قتل کیا میں نے کس طرح

دیکھو ذرا کہ ہاتھ میں تلوار بھی نہیں

ویراں کیا ہے یاس نے یوں باغ آرزو

پھولوں کا ذکر کیا ہے وہاں خار بھی نہیں

گر دوستوں کے لطف کا قائل نہیں ہوں میں

لب پر مرے شکایت اغیار بھی نہیں

taib nahin hun be khud-o-sarshar bhi nahin

jo is tarah piye wo gunah gar bhi nahin

zindan-e-rang-o-bu mein guzari hai umr yun

azad bhi nahin hun giraftar bhi nahin

itni si bat hai wo taghaful shiar hai

gar mehrban nahin to sitam gar bhi nahin

kya puchhte ho ashiq-e-bedil ki arzu

jab dil nahin to hasrat-e-didar bhi nahin

bole ke tum ko qatl kiya main ne kis tarah

dekho zara ke hath mein talwar bhi nahin

wiran kya hai yas ne yun bagh-e-arzu

phulon ka zikr kya hai wahan khar bhi nahin

gar doston ke lutf ka qail nahin hun main

lab par mire shikayat-e-aghyar bhi nahin