زخموں کے نئے پھول کھلانے کے لئے آ

زخموں کے نئے پھول کھلانے کے لئے آ

پھر موسم گل یاد دلانے کے لئے آ

مستی لئے آنکھوں میں بکھیرے ہوئے زلفیں

آ پھر مجھے دیوانہ بنانے کے لئے آ

اب لطف اسی میں ہے مزا ہے تو اسی میں

آ اے مرے محبوب ستانے کے لئے آ

آ رکھ دہن زخم پہ پھر انگلیاں اپنی

دل بانسری تیری ہے بجانے کے لئے آ

ہاں کچھ بھی تو دیرینہ محبت کا بھرم رکھ

دل سے نہ آ دنیا کو دکھانے کے لئے آ

مانا کہ مرے گھر سے عداوت ہی تجھے ہے

رہنے کو نہ آ آگ لگانے کے لئے آ

پیارے تری صورت سے بھی اچھی ہے جو تصویر

میں نے تجھے رکھی ہے دکھانے کے لئے، آ

آشفتہ کہے ہے کوئی دیوانہ کہے ہے

میں کون ہوں دنیا کو بتانے کے لئے آ

کچھ روز سے ہم شہر میں رسوا نہ ہوئے ہیں

آ پھر کوئی الزام لگانے کے لئے آ

اب کے جو وہ آ جائے تو عاجزؔ اسے لے کر

محفل میں غزل اپنی سنانے کے لئے آ

zakhmon ke nae phul khilane ke liye a

phir mausam-e-gul yad dilane ke liye a

masti liye ankhon mein bikhere hue zulfen

a phir mujhe diwana banane ke liye a

ab lutf isi mein hai maza hai to isi mein

a ai mire mahbub satane ke liye a

a rakh dahan-e-zakhm pe phir ungliyan apni

dil bansuri teri hai bajane ke liye a

han kuchh bhi to derina mohabbat ka bharam rakh

dil se na a duniya ko dikhane ke liye a

mana ke mire ghar se adawat hi tujhe hai

rahne ko na a ag lagane ke liye a

pyare tiri surat se bhi achchhi hai jo taswir

main ne tujhe rakhi hai dikhane ke liye, a

ashufta kahe hai koi diwana kahe hai

main kaun hun duniya ko batane ke liye a

kuchh roz se ham shahr mein ruswa na hue hain

a phir koi ilzam lagane ke liye a

ab ke jo wo a jae to ajiz use le kar

mahfil mein ghazal apni sunane ke liye a