یہ دیوانے کبھی پابندیوں کا غم نہیں لیں گے

یہ دیوانے کبھی پابندیوں کا غم نہیں لیں گے

گریباں چاک جب تک کر نہ لیں گے دم نہیں لیں گے

لہو دیں گے تو لیں گے پیار موتی ہم نہیں لیں گے

ہمیں پھولوں کے بدلے پھول دو شبنم نہیں لیں گے

یہ غم کس نے دیا ہے پوچھ مت اے ہم نشیں ہم سے

زمانہ لے رہا ہے نام اس کا ہم نہیں لیں گے

محبت کرنے والے بھی عجب خوددار ہوتے ہیں

جگر پر زخم لیں گے زخم پر مرہم نہیں لیں گے

غم دل ہی کے ماروں کو غم ایام بھی دے دو

غم اتنا لینے والے کیا اب اتنا غم نہیں لیں گے

سنوارے جا رہے ہیں ہم الجھتی جاتی ہیں زلفیں

تم اپنے ذمہ لو اب یہ بکھیڑا ہم نہیں لیں گے

شکایت ان سے کرنا گو مصیبت مول لینا ہے

مگر عاجزؔ غزل ہم بے سنائے دم نہیں لیں گے

ye diwane kabhi pabandiyon ka gham nahin lenge

gareban chak jab tak kar na lenge dam nahin lenge

lahu denge to lenge pyar moti ham nahin lenge

hamen phulon ke badle phul do shabnam nahin lenge

ye gham kis ne diya hai puchh mat ai ham nashin ham se

zamana le raha hai nam us ka ham nahin lenge

mohabbat karne wale bhi ajab khuddar hote hain

jigar par zakhm lenge zakhm par marham nahin lenge

gham-e-dil hi ke maron ko gham-e-ayyam bhi de do

gham itna lene wale kya ab itna gham nahin lenge

sanware ja rahe hain ham ulajhti jati hain zulfen

tum apne zimma lo ab ye bakhera ham nahin lenge

shikayat un se karna go musibat mol lena hai

magar ajiz ghazal ham be sunae dam nahin lenge