ہم کو تو خیر پہنچنا تھا جہاں تک پہنچے

ہم کو تو خیر پہنچنا تھا جہاں تک پہنچے

جو ہمیں روک رہے تھے وہ کہاں تک پہنچے

فصل گل تک رہے یا دور خزاں تک پہنچے

بات جب نکلی ہے منہ سے تو جہاں تک پہنچے

میرے اشعار میں ہے حسن معانی کی تلاش

لوگ اب تک نہ مرے درد نہاں تک پہنچے

مجھ کو رہنے دو مرے درد کی لذت میں خموش

یہ وہ افسانہ نہیں ہے جو زباں تک پہنچے

تیری زلفوں کی گھنی چھاؤں کسے ملتی ہے

کس کی تقدیر رسا ہے کہ وہاں تک پہنچے

منزل دار و رسن بھی ہے رخ و زلف کے بعد

دیکھیے شوق ہمیں لے کے کہاں تک پہنچے

ترجماں اپنا بنایا ہے مجھے رندوں نے

کاش آواز مری پیر مغاں تک پہنچے

آپ کے مشغلۂ شعر و سخن سے عاجزؔ

کام تو کچھ نہ ہوا نام جہاں تک پہنچے

ham ko to khair pahunchna tha jahan tak pahunche

jo hamen rok rahe the wo kahan tak pahunche

fasl-e-gul tak rahe ya daur-e-khizan tak pahunche

bat jab nikli hai munh se to jahan tak pahunche

mere ashar mein hai husn-e-maani ki talash

log ab tak na mire dard-e-nihan tak pahunche

mujh ko rahne do mire dard ki lazzat mein khamosh

ye wo afsana nahin hai jo zaban tak pahunche

teri zulfon ki ghani chhaon kise milti hai

kis ki taqdir rasa hai ke wahan tak pahunche

munzzal dar-o-rasan bhi hai rukh-o-zulf ke baad

dekhiye shauq hamen le ke kahan tak pahunche

tarjuman apna banaya hai mujhe rindon ne

kash awaz miri pir-e-mughan tak pahunche

ap ke mashghala-e-sher-o-sukhan se ajiz

kam to kuchh na hua nam jahan tak pahunche