بڑی طلب تھی بڑا انتظار دیکھو تو

بڑی طلب تھی بڑا انتظار دیکھو تو

بہار لائی ہے کیسی بہار دیکھو تو

یہ کیا ہوا کہ سلامت نہیں کوئی دامن

چمن میں پھول کھلے ہیں کہ خار دیکھو تو

لہو دلوں کا چراغوں میں کل بھی جلتا تھا

اور آج بھی ہے وہی کاروبار دیکھو تو

یہاں ہر اک رسن و دار ہی دکھاتا ہے

عجیب شہر عجیب شہریار دیکھو تو

نہ کوئی شانہ بچا ہے نہ کوئی آئینہ

دراز دستیٔ گیسوئے یار دیکھو تو

کسی سے پیار نہیں پھر بھی پیار ہے سب سے

وہ مست حسن ہے کیا ہوشیار دیکھو تو

وہ چپ بھی بیٹھے ہے تو ایسا بن کے بیٹھے ہے

ہر اک ادا یہ کہے ہے پکار دیکھو تو

ابھی تو خون کا سیندور ہی لگایا ہے

ابھی کرے ہے وہ کیا کیا سنگار دیکھو تو

ادا ہمیں نے سکھائی نظر ہمیں نے دی

ہمیں سے آنکھ چراؤ ہو یار دیکھو تو

اسیر کر کے ہمیں کیا پھرے ہے اتراتا

گلے میں ڈالے وہ پھولوں کا ہار دیکھو تو

bari talab thi bara intizar dekho to

bahar lai hai kaisi bahar dekho to

ye kya hua ke salamat nahin koi daman

chaman mein phul khule hain ke khar dekho to

lahu dilon ka charaghon mein kal bhi jalta tha

aur aj bhi hai wahi karobar dekho to

yahan har ik rasan-o-dar hi dikhata hai

ajib shahr ajib shahryar dekho to

na koi shana bacha hai na koi aina

daraz dasti-e-gesu-e-yar dekho to

kisi se pyar nahin phir bhi pyar hai sab se

wo mast-e-husn hai kya hoshyar dekho to

wo chup bhi baithe hai to aisa ban ke baithe hai

har ik ada ye kahe hai pukar dekho to

abhi to khun ka sendur hi lagaya hai

abhi kare hai wo kya kya singar dekho to

ada hamen ne sikhai nazar hamen ne di

hamen se ankh churao ho yar dekho to

asir kar ke hamen kya phire hai itrata

gale mein dale wo phulon ka har dekho to