مری صبح غم بلا سے کبھی شام تک نہ پہنچے

مری صبح غم بلا سے کبھی شام تک نہ پہنچے

مجھے ڈر یہ ہے برائی ترے نام تک نہ پہنچے

مرے پاس کیا وہ آتے مرا درد کیا مٹاتے

مرا حال دیکھنے کو لب بام تک نہ پہنچے

ہو کسی کا مجھ پہ احساں یہ نہیں پسند مجھ کو

تری صبح کی تجلی مری شام تک نہ پہنچے

تری بے رخی پہ ظالم مرا جی یہ چاہتا ہے

کہ وفا کا میرے لب پر کبھی نام تک نہ پہنچے

میں فغان بے اثر کا کبھی معترف نہیں ہوں

وہ صدا ہی کیا جو ان کے در و بام تک نہ پہنچے

وہ صنم بگڑ کے مجھ سے مرا کیا بگاڑ لے گا

کبھی راز کھول دوں میں تو سلام تک نہ پہنچے

مجھے لذت اسیری کا سبق پڑھا رہے ہیں

جو نکل کے آشیاں سے کبھی دام تک نہ پہنچے

انہیں مہرباں سمجھ لیں مجھے کیا غرض پڑی ہے

وہ کرم کا ہاتھ ہی کیا جو عوام تک نہ پہنچے

ہوئے فیض مے کدہ سے سبھی فیضیاب لیکن

جو غریب تشنہ لب تھے وہی جام تک نہ پہنچے

جسے میں نے جگمگایا اسی انجمن میں ساقی

مرا ذکر تک نہ آئے مرا نام تک نہ پہنچے

تمہیں یاد ہی نہ آؤں یہ ہے اور بات ورنہ

میں نہیں ہوں دور اتنا کہ سلام تک نہ پہنچے

miri subh-e-gham bala se kabhi sham tak na pahunche

mujhe dar ye hai burai tire nam tak na pahunche

mire pas kya wo ate mira dard kya mitate

mira hal dekhne ko lab-e-bam tak na pahunche

ho kisi ka mujh pe ehsan ye nahin pasand mujh ko

tiri subh ki tajalli miri sham tak na pahunche

tiri be rukhi pe zalim mira ji ye chahta hai

ke wafa ka mere lab par kabhi nam tak na pahunche

main fughan-e-be asar ka kabhi motarif nahin hun

wo sada hi kya jo un ke dar-o-bam tak na pahunche

wo sanam bigar ke mujh se mira kya bigar lega

kabhi raz khol dun main to salam tak na pahunche

mujhe lazzat-e-asiri ka sabaq parha rahe hain

jo nikal ke ashiyan se kabhi dam tak na pahunche

unhen mehrban samajh len mujhe kya gharaz pari hai

wo karam ka hath hi kya jo awam tak na pahunche

hue faiz-e-mai kada se sabhi faizyab lekin

jo gharib tishna lab the wahi jam tak na pahunche

jise main ne jagmagaya isi anjuman mein saqi

mira zikr tak na ae mira nam tak na pahunche

tumhen yad hi na aun ye hai aur bat warna

main nahin hun dur itna ke salam tak na pahunche