وہ شب شکن سے نیا آفتاب نکلا ہے

وہ شب شکن سے نیا آفتاب نکلا ہے

لہو کی شاخ پہ تنہا گلاب نکلا ہے

مری کتاب میں جس کا کوئی نشاں بھی نہیں

اسی کے نام مگر انتساب نکلا ہے

جہاں جہاں مجھے چاہا تھا تو نے خرچ کیا

اسی لحاظ سے میرا حساب نکلا ہے

نہ سیکڑوں نہ ہزاروں نہ لاکھ کی باتیں

وہ انتخاب میں بھی انتخاب نکلا ہے

جو دوسروں کے تعاقب میں روز و شب کاٹے

اسی کے گھر سے نیا احتساب نکلا ہے

شجر شجر ہوئے شاداب پھول پھل آئے

نئے سفر پہ اگر انقلاب نکلا ہے

کچھ ایسے وقت نے لوٹا شباب تک اس کا

اسی کی کھوج میں خانہ خراب نکلا ہے

wo shab shikan se naya aftab nikla hai

lahu ki shakh pe tanha gulab nikla hai

miri kitab mein jis ka koi nishan bhi nahin

usi ke nam magar intisab nikla hai

jahan jahan mujhe chaha tha tu ne kharch kiya

isi lihaz se mera hisab nikla hai

na saikron na hazaron na lakh ki baten

wo intikhab mein bhi intikhab nikla hai

jo dusron ke taaqub mein roz-o-shab kate

usi ke ghar se naya ehtisab nikla hai

shajar shajar hue shadab phul phal ae

nae safar pe agar inqilab nikla hai

kuchh aise waqt ne lauta shabab tak us ka

usi ki khoj mein khana kharab nikla hai