بیتے دنوں کی تو اگر تحریر لکھ

بیتے دنوں کی تو اگر تحریر لکھ

اپنے قلم سے وقت کی تقدیر لکھ

محدود معنی میں سمٹ کر رہ کبھی

جب پھیل جائے تو کوئی تفسیر لکھ

محروم آنکھوں سے بھی ہو تو پڑھ لے خط

تاریک شب پر اس طرح تنویر لکھ

دشت و بیاباں میں نہیں تو چھوڑ دے

یا میرے خوابوں کی کوئی تعبیر لکھ

آواز کے سائے میں بے آواز ہوں

اقبالؔ غالبؔ اور نہ مجھ کو میرؔ لکھ

اس سال کیا ہے برف باری کا غضب

ڈل جھیل ہو یا گلشن کشمیر لکھ

آزاد ہو کر بھی مقید ہوں ظفرؔ

جو توڑ دے زنداں کو وہ زنجیر لکھ

bite dinon ki to agar tahrir likh

apne qalam se waqt ki taqdir likh

mahdud maani mein simat kar rah kabhi

jab phail jae to koi tafsir likh

mahrum ankhon se bhi ho to parh le khat

tarik shab par is tarah tanwir likh

dasht-o-bayaban mein nahin to chhor de

ya mere khwabon ki koi taabir likh

awaz ke sae mein be awaz hun

iqbal ghalib aur na mujh ko mir likh

is sal kya hai barf bari ka ghazab

dal jhil ho ya gulshan-e-kashmir likh

azad ho kar bhi muqayyad hun zafar

jo tor de zindan ko wo zanjir likh