سواد ہجر میں رکھا ہوا دیا ہوں میں

سواد ہجر میں رکھا ہوا دیا ہوں میں

تجھے خبر نہیں کس آگ میں جلا ہوں میں

میں قریہ قریہ پھرا گرد باد بن کے جہاں

اسی زمین پہ پرچم صفت اٹھا ہوں میں

ابھی چھٹی نہیں جنت کی دھول پاؤں سے

ہنوز فرش زمیں پر نیا نیا ہوں میں

ہزار شکر ہے کہ خود پہ استوار تھا میں

ہزار شکر کہ بنیاد پر گرا ہوں میں

مری شگفت کے موسم ابھی نہیں آئے

کہیں کہیں پہ مگر پھر بھی کھل گیا ہوں میں

مری شکست بھی ہے ریخت افتخارؔ مغل

کہ یونہی بننے بگڑنے میں ہی بنا ہوں میں

sawad-e-hijr mein rakha hua diya hun main

tujhe khabar nahin kis ag mein jala hun main

main qarya qarya phira gard-e-bad ban ke jahan

isi zamin pe parcham sifat utha hun main

abhi chhutti nahin jannat ki dhul paon se

hanoz farsh-e-zamin par naya naya hun main

hazar shukr hai ke khud pe ustuwar tha main

hazar shukr ke buniyad par gira hun main

miri shagfat ke mausam abhi nahin ae

kahin kahin pe magar phir bhi khul gaya hun main

miri shikast bhi hai rekht iftikhar mughal

ke yunhi banne bigarne mein hi bana hun main