ہر رنج قبول کر رہا ہوں

ہر رنج قبول کر رہا ہوں

زخموں کو میں پھول کر رہا ہوں

اک پل کی یہ زندگی ہے میری

لیکن اسے طول کر رہا ہوں

جس جس کو عطا کیا خدا نے

وہ درد وصول کر رہا ہوں

جو حرف فعل سے روٹھ جائے

اس کو میں فعول کر رہا ہوں

لوہے کی کھڑی ہوئی ہے دیوار

اور میں اسے دھول کر رہا ہوں

پہچان کے اپنے آپ کو بھی

پھر بھی کہیں بھول کر رہا ہوں

اپنوں کے تعلقات سارے

غیروں سے وصول کر رہا ہوں

ہر سمت ہوا چلی کچھ ایسی

شیشم کو ببول کر رہا ہوں

ہر گام پہ ظلمتوں میں رکھ دے

اس کو بھی رسول کر رہا ہوں

میں باد صبا پہ رکھ کے پہرے

کلیوں کو ملول کر رہا ہوں

جس سے ہے سب انتشار برپا

اس کو ہی اصول کر رہا ہوں

حاصل نہ ہو کچھ ظفرؔ مجھے تو

سب کام فضول کر رہا ہوں

har ranj qubul kar raha hun

zakhmon ko main phul kar raha hun

ik pal ki ye zindagi hai meri

lekin use tul kar raha hun

jis jis ko ata kiya khuda ne

wo dard wusul kar raha hun

jo harf fel se ruth jae

us ko main fol kar raha hun

lohe ki khari hui hai diwar

aur main use dhul kar raha hun

pahchan ke apne ap ko bhi

phir bhi kahin bhul kar raha hun

apnon ke taalluqat sare

ghairon se wusul kar raha hun

har samt hawa chali kuchh aisi

shisham ko babul kar raha hun

har gam pe zulmaton mein rakh de

us ko bhi rasul kar raha hun

main bad-e-saba pe rakh ke pahre

kaliyon ko malul kar raha hun

jis se hai sab intishar barpa

us ko hi usul kar raha hun

hasil na ho kuchh zafar mujhe to

sab kam fuzul kar raha hun