کوئی وجود ہے دنیا میں کوئی پرچھائیں

کوئی وجود ہے دنیا میں کوئی پرچھائیں

سو ہر کوئی نہیں ہوتا کسی کی پرچھائیں

مرے وجود کو مانو تو ساتھ چلتا ہوں

کہ میں تو بن نہ سکوں گا تمہاری پرچھائیں

یہی چراغ ہے سب کچھ کہ دل کہیں جس کو

اگر یہ بجھ گیا تو آدمی بھی پرچھائیں

کئی دنوں سے مرے ساتھ ساتھ چلتی ہے

کوئی اداس سی ٹھنڈی سی کوئی پرچھائیں

میں اپنا آپ سمجھتا رہا جسے تا عمر

وہ میرے جیسا ہیولیٰ تھا میری پرچھائیں

نہ خوش ہو کوئی بھی تیزی سے بڑھتی قامت پر

پس غروب نہ ہوگی بچاری پرچھائیں

گمان ہست ہے ہستی کا آئینہ خانہ

سو اپنے آپ کو بھی جان اپنی پرچھائیں

میں نصف سچ کی طرح ہوں بھی اور نہیں بھی ہوں

کہ آدھا جسم ہے میرا تو آدھی پرچھائیں

پھر اس سے اس کے تغافل کا کیا گلہ کرنا

کہ افتخارؔ مغل وہ تو تھی ہی پرچھائیں

koi wajud hai duniya mein koi parchhain

so har koi nahin hota kisi ki parchhain

mire wajud ko mano to sath chalta hun

ke main to ban na sakunga tumhari parchhain

yahi charagh hai sab kuchh ke dil kahin jis ko

agar ye bujh gaya to admi bhi parchhain

kai dinon se mire sath sath chalti hai

koi udas si thandi si koi parchhain

main apna ap samajhta raha jise ta umar

wo mere jaisa hayula tha meri parchhain

na khush ho koi bhi tezi se barhti qamat par

pas ghurub na hogi bichari parchhain

guman hast hai hasti ka aina khana

so apne ap ko bhi jan apni parchhain

main nisf sach ki tarah hun bhi aur nahin bhi hun

ke adha jism hai mera to adhi parchhain

phir us se us ke taghaful ka kya gila karna

ke iftikhar mughal wo to thi hi parchhain