کسی سبب سے اگر بولتا نہیں ہوں میں

کسی سبب سے اگر بولتا نہیں ہوں میں

تو یوں نہیں کہ تجھے سوچتا نہیں ہوں میں

میں تم کو خود سے جدا کر کے کس طرح دیکھوں

کہ میں بھی تم ہوں، کوئی دوسرا نہیں ہوں میں

تو یہ بھی طے! کہ بچھڑ کر بھی لوگ جیتے ہیں

میں جی رہا ہوں اگرچہ جیا نہیں ہوں میں

کسی میں کوئی بڑا پن مجھے دکھائی نہ دے

خدا کا شکر کہ اتنا بڑا نہیں ہوں میں

مری اٹھان کی ہر اینٹ میں نے رکھی ہے

میں خود بنا ہوں بنایا ہوا نہیں ہوں میں

یہاں جو آئے گا وہ خود کو ہار جائے گا

قمار خانۂ جاں میں نیا نہیں ہوں میں

مرے وجود کے اندر مجھے تلاش نہ کر

کہ اس مکان میں اکثر رہا نہیں ہوں میں

میں ایک عمر سے خود کو تلاشتا ہوں مگر

مجھے یقین نہیں، ہوں بھی یا نہیں ہوں میں

میں اک گمان کا امکاں ہوں افتخارؔ مغل

کہ ہو تو سکتا ہوں لیکن ہوا نہیں ہوں میں

kisi sabab se agar bolta nahin hun main

to yun nahin ke tujhe sochta nahin hun main

main tum ko khud se juda kar ke kis tarah dekhun

ke main bhi tum hun, koi dusra nahin hun main

to ye bhi tai! ke bichhar kar bhi log jite hain

main ji raha hun agarche jiya nahin hun main

kisi mein koi bara pan mujhe dikhai na de

khuda ka shukr ke itna bara nahin hun main

miri uthan ki har int main ne rakhi hai

main khud bana hun banaya hua nahin hun main

yahan jo aega wo khud ko har jaega

qimar khana-e-jan mein naya nahin hun main

mire wajud ke andar mujhe talash na kar

ke is makan mein aksar raha nahin hun main

main ek umr se khud ko talashta hun magar

mujhe yaqin nahin, hun bhi ya nahin hun main

main ik guman ka imkan hun iftikhar mughal

ke ho to sakta hun lekin hua nahin hun main