پی کر چین اگر آیا بھی کتنی دیر کو آئے گا

پی کر چین اگر آیا بھی کتنی دیر کو آئے گا

نشہ اک آوارہ پنچھی چہکے گا اڑ جائے گا

منظر کی تکمیل نہ ہوگی تنہا مجھ سے فن کارو

دکھ کے گیت تو میں گا دوں گا آنسو کون بہائے گا

ایک سخی کو اپنا سمجھ کر عرض حال کی ٹھانی ہے

بیری دل کہتا ہے پگلے کاسہ بھی چھن جائے گا

میرا سمندر پار سفر پر جانا ایک قیامت ہے

جیسے ہر چہرے پہ لکھا ہو میرے لیے کیا لائے گا

جاتے جاتے پوچھ رہا ہے امن کے رکھوالوں سے حفیظؔ

کیوں جی کیا ہم لوگوں سے میرٹھ خالی ہو جائے گا

pi kar chain agar aya bhi kitni der ko aega

nasha ik awara panchhi chahkega ur jaega

manzar ki takmil na hogi tanha mujh se fan karo

dukh ke git to main ga dunga ansu kaun bahaega

ek sakhi ko apna samajh kar arz-e-hal ki thani hai

beri dil kahta hai pigle kasa bhi chhin jaega

mera samundar par safar par jana ek qayamat hai

jaise har chehre pe likha ho mere liye kya laega

jate jate puchh raha hai amn ke rakhwalon se hafiz

kyun ji kya ham logon se merath khali ho jaega