گھنے جنگلوں میں کرن رہ گئی

گھنے جنگلوں میں کرن رہ گئی

ہمارے بدن میں تھکن رہ گئی

اجالوں کو تنہائیاں پی گئیں

اندھیروں میں غرق انجمن رہ گئی

کہیں رشتۂ جان و تن کھو گیا

کہیں ساتھ تاب بدن رہ گئی

لہو رو کے کہتا رہا میں غزل

پس پردہ فکر سخن رہ گئی

میں گونگے سفر کا مسافر رہا

ہر اک گام پر اک جلن رہ گئی

جو بستر سے اٹھا سنبھلتے ہوئے

جبین سحر پر شکن رہ گئی

ظفرؔ جس سے خوشبو کی لذت ملی

بکھر کر وہ شاخ چمن رہ گئی

ghane jangalon mein kiran rah gai

hamare badan mein thakan rah gai

ujalon ko tanhaiyan pi gain

andheron mein gharq-e-anjuman rah gai

kahin rishta-e-jan-o-tan kho gaya

kahin sath tab-e-badan rah gai

lahu ro ke kahta raha main ghazal

pas-e-parda fikr-e-sukhan rah gai

main gunge safar ka musafir raha

har ik gam par ik jalan rah gai

jo bistar se utha sambhalte hue

jabin-e-sahar par shikan rah gai

zafar jis se khushbu ki lazzat mili

bikhar kar wo shakh-e-chaman rah gai