سن سن کے چپ ہیں طعنۂ اغیار کیا کریں

سن سن کے چپ ہیں طعنۂ اغیار کیا کریں

مجبور ہیں وفا کے پرستار کیا کریں

روئیں لہو نہ دیدۂ خوں بار کیا کریں

مجروح جب ہو عشق کا پندار کیا کریں

اظہار حق کے واسطے منصور اب کہاں

باطل پرست حوصلۂ دار کیا کریں

ہو جائے شش جہت نہ کہیں یہ دھواں دھواں

جوش جنوں میں آہ شرربار کیا کریں

ساقی یہ تشنگی سر مے خانہ تا بہ کے

جام و سبو نہ توڑیں تو مے خوار کیا کریں

جب آستین شیخ حرم غرق بادہ ہو

لوگ احترام جبہ و دستار کیا کریں

ہم فخرؔ سرکشوں کے نہ آگے کبھی جھکے

رکھتے ہیں اک طبیعت خوددار کیا کریں

sun sun ke chup hain taana-e-aghyar kya karen

majbur hain wafa ke parastar kya karen

roen lahu na dida-e-khun bar kya karen

majruh jab ho ishq ka pindar kya karen

izhar-e-haq ke waste mansur ab kahan

batil parast hausla-e-dar kya karen

ho jae shash jihat na kahin ye dhuan dhuan

josh-e-junun mein ah shararbar kya karen

saqi ye tishnagi sar-e-mai khana ta ba ke

jam-o-subu na toren to mai khwar kya karen

jab astin shaikh-e-haram gharq-e-bada ho

log ehtiram-e-jubba-o-dastar kya karen

ham fakhr sarkashon ke na age kabhi jhuke

rakhte hain ik tabiat-e-khuddar kya karen