Arooz is now on the App Store, for iPhone and iPad. Download →

All poetry

چمن میں خار ہی کیا گل بھی دل فگار ملے

Jafar Abbas Safvi (b. 1938)

چمن میں خار ہی کیا گل بھی دل فگار ملے

فریب خوردۂ رنگینیٔ بہار ملے

مزہ تو جب ہے کہ وہ آفتاب صبح جمال

گلے لپٹ کے سر شام انتظار ملے

نگاہ یاس سے منہ تک رہا ہوں اک اک کا

کوئی تو بزم رقیباں میں غم گسار ملے

جنہوں نے اپنے لہو سے چمن کو سینچا تھا

انہیں کے جیب و گریبان تار تار ملے

میں ان کے وعدوں کا یوں بھی یقین کرتا ہوں

ملے ملے نہ ملے لطف انتظار ملے

قفس کے بعد چمن میں یہ دیکھنا ہے مجھے

خزاں ملے کہ وہاں موسم بہار ملے

وہی تو فکر سخن آج کل کرے جعفرؔ

جسے حیات کا ماحول خوش گوار ملے