محبت کا فسانہ ہم سے دہرایا نہیں جاتا

محبت کا فسانہ ہم سے دہرایا نہیں جاتا

بس اب ہم سے فریب آرزو کھایا نہیں جاتا

یہاں تک تو مجھے دست کرم پر ناز ہے ان کے

اگر اب ہاتھ پھیلاؤں تو پھیلایا نہیں جاتا

تماشہ دیکھنے والے تماشہ بن کے رہ جائیں

بقدر درد تم سے دل کو تڑپایا نہیں جاتا

یہ عالم ہے قفس کا در کھلا ہے صحن گلشن میں

مگر صیاد کو اب چھوڑ کر جایا نہیں جاتا

مجھے دیکھو کہ غیروں کو بھی سینے سے لگاتا ہوں

مگر تم سے تو اپنوں کو بھی اپنایا نہیں جاتا

جو آنکھیں دیکھ لیتی ہیں خزاں کا دور پھر ان سے

بہاروں کا فریب رنگ و بو کھایا نہیں جاتا

میں ان کو بے رخی کا کس لئے الزام دوں جعفرؔ

اندھیرے میں تو اپنا دو قدم سایا نہیں جاتا

mohabbat ka fasana ham se dohraya nahin jata

bas ab ham se fareb-e-arzu khaya nahin jata

yahan tak to mujhe dast-e-karam par naz hai un ke

agar ab hath phailaun to phailaya nahin jata

tamasha dekhne wale tamasha ban ke rah jaen

baqadr-e-dard tum se dil ko tarpaya nahin jata

ye alam hai qafas ka dar khula hai sehn-e-gulshan mein

magar sayyad ko ab chhor kar jaya nahin jata

mujhe dekho ke ghairon ko bhi sine se lagata hun

magar tum se to apnon ko bhi apnaya nahin jata

jo ankhen dekh leti hain khizan ka daur phir un se

baharon ka fareb-e-rang-o-bu khaya nahin jata

main un ko be rukhi ka kis liye ilzam dun jaafar

andhere mein to apna do qadam saya nahin jata