انکار ہی کر دیجیے اقرار نہیں تو

انکار ہی کر دیجیے اقرار نہیں تو

الجھن ہی میں مر جائے گا بیمار نہیں تو

لگتا ہے کہ پنجرے میں ہوں دنیا میں نہیں ہوں

دو روز سے دیکھا کوئی اخبار نہیں تو

دنیا ہمیں نابود ہی کر ڈالے گی اک دن

ہم ہوں گے اگر اب بھی خبردار نہیں تو

کچھ تو رہے اسلاف کی تہذیب کی خوشبو

ٹوپی ہی لگا لیجیے دستار نہیں تو

ہم برسر پیکار ستم گر سے ہمیشہ

رکھتے ہیں قلم ہاتھ میں تلوار نہیں تو

بھائی کو ہے بھائی پہ بھروسہ تو بھلا ہے

آنگن میں بھی اٹھ جائے گی دیوار نہیں تو

بے سود ہر اک قول ہر اک شعر ہے راغبؔ

گر اس کے موافق ترا کردار نہیں تو

inkar hi kar dijiye iqrar nahin to

uljhan hi mein mar jaega bimar nahin to

lagta hai ke pinjre mein hun duniya mein nahin hun

do roz se dekha koi akhbar nahin to

duniya hamen nabud hi kar dalegi ik din

ham honge agar ab bhi khabardar nahin to

kuchh to rahe aslaf ki tahzib ki khushbu

topi hi laga lijiye dastar nahin to

ham barsar paikar sitam gar se hamesha

rakhte hain qalam hath mein talwar nahin to

bhai ko hai bhai pe bharosa to bhala hai

angan mein bhi uth jaegi diwar nahin to

be sud har ik qaul har ik sher hai raghib

gar us ke muafiq tira kirdar nahin to