Arooz is now on the App Store, for iPhone and iPad. Download →

All poetry

انداز ستم ان کا نہایت ہی الگ ہے

Iftikhar Raghib (b. 1973)

انداز ستم ان کا نہایت ہی الگ ہے

گزری ہے جو دل پر وہ قیامت ہی الگ ہے

لے جائے جہاں چاہے ہوا ہم کو اڑا کر

ٹوٹے ہوئے پتوں کی حکایت ہی الگ ہے

پردیس میں رہ کر کوئی کیا پانو جمائے

گملے میں لگے پھول کی قسمت ہی الگ ہے

جتنا ہے ثمر جس پہ وہ اتنا ہے خمیدہ

پھل دار درختوں کی طبیعت ہی الگ ہے

باہر سے تو لگتا ہے کہ شاداب ہے گلشن

اندر سے ہر اک پیڑ کی حالت ہی الگ ہے

ہر ایک غزل تجھ سے ہی منسوب ہے میری

انداز مرا تیری بدولت ہی الگ ہے

کس کس کو بتاؤں کہ میں بزدل نہیں راغبؔ

اس دور میں مفہوم شرافت ہی الگ ہے