ترک تعلقات نہیں چاہتا تھا میں

ترک تعلقات نہیں چاہتا تھا میں

غم سے ترے نجات نہیں چاہتا تھا میں

کب چاہتا تھا تیری عنایت کی بارشیں

شادابیٔ حیات نہیں چاہتا تھا میں

مجھ سے تو اے بہشت نظر یوں نظر نہ پھیر

کیا تجھ کو تا حیات نہیں چاہتا تھا میں

میں چاہتا تھا تم سے نہ جیتوں کبھی مگر

کھا جاؤں خود سے مات نہیں چاہتا تھا میں

گزری ہے دل پہ کیسی قیامت میں کیا کہوں

نفرت کی کائنات نہیں چاہتا تھا میں

کیا حال اب ہے تیرے تعاقب میں اے حیات

تو یوں ہی آئے ہات نہیں چاہتا تھا میں

میں چاہتا تھا راہ میں کچھ مشکلیں مگر

ہر ہر قدم پہ گھات نہیں چاہتا تھا میں

راغبؔ وہ میری فکر میں خود کو بھی بھول جائیں

ایسی تو کوئی بات نہیں چاہتا تھا میں

tark-e-taalluqat nahin chahta tha main

gham se tire najat nahin chahta tha main

kab chahta tha teri inayat ki barishen

shadabi-e-hayat nahin chahta tha main

mujh se to ai bahisht nazar yun nazar na pher

kya tujh ko ta hayat nahin chahta tha main

main chahta tha tum se na jitun kabhi magar

kha jaun khud se mat nahin chahta tha main

guzri hai dil pe kaisi qayamat mein kya kahun

nafrat ki kainat nahin chahta tha main

kya hal ab hai tere taaqub mein ai hayat

to yun hi ae hat nahin chahta tha main

main chahta tha rah mein kuchh mushkilen magar

har har qadam pe ghat nahin chahta tha main

raghib wo meri fikr mein khud ko bhi bhul jaen

aisi to koi bat nahin chahta tha main