کہا میں نے مری آنکھوں میں پانی ہے

کہا میں نے مری آنکھوں میں پانی ہے

جواب آیا محبت کی نشانی ہے

کہا میں نے لگی دل کی بجھانی ہے

جواب آیا یہ جذبہ جاودانی ہے

کہا میں نے کھلیں گے کب وفا کے پھول

جواب آیا ابھی موسم خزانی ہے

کہا میں نے محبت محور ہستی

جواب آیا بلائے ناگہانی ہے

کہا میں نے کہ ہر لمحہ سسکتا ہوں

جواب آیا کہ الفت تو نبھانی ہے

کہا میں نے ستم اتنا نہیں اچھا

جواب آیا محبت آزمانی ہے

کہا میں نے متاع زیست یعنی تو

جواب آیا یہاں ہر چیز فانی ہے

کہا میں نے کہ دیکھ ان سرخ آنکھوں میں

جواب آیا محبت آسمانی ہے

کہا میں نے کہ کیوں اتنے گریزاں ہو

جواب آیا تمہاری مہربانی ہے

کہا میں نے مری غزلوں کی جاں ہو تم

جواب آیا تمہاری خوش گمانی ہے

کہا میں نے خموشی مار ڈالے گی

جواب ان کا مکمل بے زبانی ہے

کہا میں نے سناؤ حال دل راغبؔ

جواب آیا بہت لمبی کہانی ہے

kaha main ne miri ankhon mein pani hai

jawab aya mohabbat ki nishani hai

kaha main ne lagi dil ki bujhani hai

jawab aya ye jazba jawidani hai

kaha main ne khulenge kab wafa ke phul

jawab aya abhi mausam khuzzani hai

kaha main ne mohabbat mehwar-e-hasti

jawab aya bala-e-nagahani hai

kaha main ne ke har lamha sisakta hun

jawab aya ke ulfat to nibhani hai

kaha main ne sitam itna nahin achchha

jawab aya mohabbat azmani hai

kaha main ne mata-e-zist yaani tu

jawab aya yahan har chiz fani hai

kaha main ne ke dekh un surkh ankhon mein

jawab aya mohabbat asmani hai

kaha main ne ke kyun itne gurezan ho

jawab aya tumhari mehrbani hai

kaha main ne miri ghazlon ki jan ho tum

jawab aya tumhari khush gumani hai

kaha main ne khamoshi mar dalegi

jawab un ka mukammal be zabani hai

kaha main ne sunao hal-e-dil raghib

jawab aya bahut lambi kahani hai