اچھے دنوں کی آس لگا کر میں نے خود کو روکا ہے

اچھے دنوں کی آس لگا کر میں نے خود کو روکا ہے

کیسے کیسے خواب دکھا کر میں نے خود کو روکا ہے

میں نے خود کو روکا ہے جذبات کی رو میں بہنے سے

دل میں سو ارمان دبا کر میں نے خود کو روکا ہے

فرقت کے موسم میں کیسے زندہ ہوں تم کیا جانو

کیسے اس دل کو سمجھا کر میں نے خود کو روکا ہے

چھوڑ کے سب کچھ تم سے ملنے آ جانا دشوار نہیں

مستقبل کا خوف دلا کر میں نے خود کو روکا ہے

کٹتے کہاں ہیں ہجر کے لمحے پھر بھی ایک زمانے سے

تیری یادوں سے بہلا کر میں نے خود کو روکا ہے

واپس جانے کے سب رستے میں نے خود مسدود کیے

کشتی اور پتوار جلا کر میں نے خود کو روکا ہے

جب بھی میں نے چاہا راغبؔ دشمن پر یلغار کروں

خود کو اپنے سامنے پا کر میں نے خود کو روکا ہے

achchhe dinon ki as laga kar main ne khud ko roka hai

kaise kaise khwab dikha kar main ne khud ko roka hai

main ne khud ko roka hai jazbat ki rau mein bahne se

dil mein so arman daba kar main ne khud ko roka hai

furqat ke mausam mein kaise zinda hun tum kya jano

kaise is dil ko samjha kar main ne khud ko roka hai

chhor ke sab kuchh tum se milne a jana dushwar nahin

mustaqbil ka khauf dila kar main ne khud ko roka hai

katte kahan hain hijr ke lamhe phir bhi ek zamane se

teri yadon se bahla kar main ne khud ko roka hai

wapas jane ke sab raste main ne khud masdud kiye

kashti aur patwar jala kar main ne khud ko roka hai

jab bhi main ne chaha raghib dushman par yalghar karun

khud ko apne samne pa kar main ne khud ko roka hai