حیف باعث ترے عتاب کا میں

حیف باعث ترے عتاب کا میں

کیا کروں اپنے اضطراب کا میں

تیری آنکھوں کے آئنے میں رہوں

عکس بن جاؤں تیرے خواب کا میں

ربط میں بھی حساب ان کا میں

اور قائل ہوں بے حساب کا میں

اور کب تک رہوں میں مثل سوال

منتظر آپ کے جواب کا میں

سرد مہری کا ہے لحاف ان پر

اور پیکر ہوں اضطراب کا میں

جو محبت کے نام ہے منسوب

اک ورق ہوں اسی کتاب کا میں

مجتنب میرے التفات سے وہ

تختۂ مشق اجتناب کا میں

کیا کروں آئنہ ہے میرے پاس

ورنہ دشمن نہیں جناب کا میں

کیوں اندھیرے خلاف ہیں میرے

کون لگتا ہوں آفتاب کا میں

متن روداد عشق کا راغبؔ

یا خلاصہ جنوں کے باب کا میں

haif bais tire itab ka main

kya karun apne iztirab ka main

teri ankhon ke aine mein rahun

aks ban jaun tere khwab ka main

rabt mein bhi hisab un ka main

aur qail hun be hisab ka main

aur kab tak rahon main misl-e-sawal

muntazir ap ke jawab ka main

sard mehri ka hai lihaf un par

aur paikar hun iztirab ka main

jo mohabbat ke nam hai mansub

ik waraq hun isi kitab ka main

mujtanab mere iltifat se wo

takhta-e-mashq ijtinab ka main

kya karun aina hai mere pas

warna dushman nahin janab ka main

kyun andhere khilaf hain mere

kaun lagta hun aftab ka main

matn rudad ishq ka raghib

ya khulasa junun ke bab ka main