اگر وہ مل کے بچھڑنے کا حوصلہ رکھتا

اگر وہ مل کے بچھڑنے کا حوصلہ رکھتا

تو درمیاں نہ مقدر کا فیصلہ رکھتا

وہ مجھ کو بھول چکا اب یقین ہے ورنہ

وفا نہیں تو جفاؤں کا سلسلہ رکھتا

بھٹک رہے ہیں مسافر تو راستے گم ہیں

اندھیری رات میں دیپک کوئی جلا رکھتا

مہک مہک کے بکھرتی ہیں اس کے آنگن میں

وہ اپنے گھر کا دریچہ اگر کھلا رکھتا

اگر وہ چاند کی بستی کا رہنے والا تھا

تو اپنے ساتھ ستاروں کا قافلہ رکھتا

جسے خبر نہیں خود اپنی ذات کی زریںؔ

وہ دوسروں کا بھلا کس طرح پتا رکھتا

agar wo mil ke bichharne ka hausla rakhta

tu darmiyan na muqaddar ka faisla rakhta

wo mujh ko bhul chuka ab yaqin hai warna

wafa nahin to jafaon ka silsila rakhta

bhatak rahe hain musafir to raste gum hain

andheri rat mein dipak koi jala rakhta

mahak mahak ke bikharti hain us ke angan mein

wo apne ghar ka daricha agar khula rakhta

agar wo chand ki basti ka rahne wala tha

tu apne sath sitaron ka qafila rakhta

jise khabar nahin khud apni zat ki zarrin

wo dusron ka bhala kis tarah pata rakhta