عجیب کرب مسلسل دل و نظر میں رہا

عجیب کرب مسلسل دل و نظر میں رہا

وہ روشنی کا مسافر اندھیرے گھر میں رہا

وہ چاندنی کا مرقع نہیں تھا جگنو تھا

چراغ بن کے جلا اور شجر شجر میں رہا

کہاوتوں کی طرح وہ بھی شہر معنی تھا

بجھا بجھا سا دیا جو کسی کھنڈر میں رہا

وہ جس کو کھوج سرابوں میں تھی سمندر کی

وہ اپنے دشت دل و جاں کی رہ گزر میں رہا

وہی تو نقش قدم تھے جو سارے مٹتے گئے

وہ داغ سجدہ تھا باقی جو سنگ در میں رہا

یہی طلسم تھا زریںؔ جسے نہ توڑ سکی

وجود اس کا تو تقدیر کے بھنور میں رہا

ajib karb-e-musalsal dil-o-nazar mein raha

wo raushni ka musafir andhere ghar mein raha

wo chandni ka muraqqaa nahin tha jugnu tha

charagh ban ke jala aur shajar shajar mein raha

kahawaton ki tarah wo bhi shahr maani tha

bujha bujha sa diya jo kisi khandar mein raha

wo jis ko khoj sarabon mein thi samundar ki

wo apne dasht-e-dil-o-jan ki rah guzar mein raha

wahi to naqsh-e-qadam the jo sare mitte gae

wo dagh sajda tha baqi jo sang dar mein raha

yahi tilism tha zarrin jise na tor saki

wajud us ka to taqdir ke bhanwar mein raha