بے سمت راستوں پہ صدا لے گئی مجھے

بے سمت راستوں پہ صدا لے گئی مجھے

آہٹ مگر جنوں کی بچا لے گئی مجھے

پتھر کے جسم موم کے چہرے دھواں دھواں

کس شہر میں اڑا کے ہوا لے گئی مجھے

ماتھے پہ اس کے دیکھ کے لالی سندور کی

زخموں کی انجمن میں حنا لے گئی مجھے

خوشبو پگھلتے لمحوں کی سانسوں میں کھو گئی

خوشبو کی وادیوں میں صبا لے گئی مجھے

جو لوگ بھیک دیتے ہیں چہرے کو دیکھ کر

زریںؔ انہیں کے در پہ انا لے گئی مجھے

be samt raston pe sada le gai mujhe

ahat magar junun ki bacha le gai mujhe

patthar ke jism mom ke chehre dhuan dhuan

kis shahr mein ura ke hua le gai mujhe

mathe pe us ke dekh ke lali sindur ki

zakhmon ki anjuman mein hina le gai mujhe

khushbu pighalte lamhon ki sanson mein kho gai

khushbu ki wadiyon mein saba le gai mujhe

jo log bhik dete hain chehre ko dekh kar

zarrin unhen ke dar pe ana le gai mujhe