نہ ہوتے شاد آئین گلستاں دیکھنے والے

نہ ہوتے شاد آئین گلستاں دیکھنے والے

فسانہ بھی اگر پڑھ لیتے عنواں دیکھنے والے

ہلاکت خیز ایجادوں پہ دنیا فخر کرتی ہے

کہاں ہیں ارتقائے نوع انساں دیکھنے والے

جو ممکن ہو تم اپنے ہاتھ کی ریکھا کھرچ ڈالو

کہ ہم ہیں تو سہی خواب پریشاں دیکھنے والے

یہ رخنے ہیں یہ در ہیں یہ ترے اجداد کے سر ہیں

ادھر آ کتبۂ دیوار زنداں دیکھنے والے

طلوع آفتاب آگہی کیا خاک دیکھیں گے

حقارت سے مرا چاک گریباں دیکھنے والے

تو پھر کیسی نظر بندی طلسمات تدبر کیا

جو خود کو دیکھ لیں جشن چراغاں دیکھنے والے

شکست ذوق نظارہ مقدر ہی سہی غوثیؔ

انہیں دیکھیں گے پھر بھی تا بہ امکاں دیکھنے والے

na hote shad ain-e-gulistan dekhne wale

fasana bhi agar parh lete unwan dekhne wale

halakat khez ijadon pe duniya fakhr karti hai

kahan hain irtiqa-e-nau-e-insan dekhne wale

jo mumkin ho tum apne hath ki rekha khurach dalo

ke ham hain to sahi khwab-e-pareshan dekhne wale

ye rakhne hain ye dar hain ye tire ajdad ke sar hain

idhar a katba-e-diwar-e-zindan dekhne wale

tulu-e-aftab-e-agahi kya khak dekhenge

hiqarat se mira chak-e-gareban dekhne wale

to phir kaisi nazar bandi tilismat-e-tadabbur kya

jo khud ko dekh len jashn-e-charaghan dekhne wale

shikast-e-zauq-e-nazzara muqaddar hi sahi ghausi

unhen dekhenge phir bhi ta ba imkan dekhne wale