سب کچھ تو زندگی کی متاع سفر میں ہے

سب کچھ تو زندگی کی متاع سفر میں ہے

جب تم نظر میں ہو تو زمانہ نظر میں ہے

یوں بھی تو سوچ ناز کش حسن دوستاں

تیرا بھی کچھ مقام کسی کی نظر میں ہے

پڑھ لیتے ہیں وہ سب کی نظر سے دلوں کا حال

اندر سے کون کیا ہے سب ان کی نظر میں ہے

کیوں ہو رہا ہے تجزیۂ جور ناروا

تصویر کا یہ رخ بھی کسی کی نظر میں ہے

یارو شکار وقت ہوں یا آسماں شکار

جو کچھ بھی ہوں سب اہل نظر کی نظر میں ہے

اب کیا شکایت روش دوستاں کروں

غوثیؔ مری کمی بھی تو میری نظر میں ہے

sab kuchh to zindagi ki mata-e-safar mein hai

jab tum nazar mein ho to zamana nazar mein hai

yun bhi to soch naz kash-e-husn-e-dostan

tera bhi kuchh maqam kisi ki nazar mein hai

parh lete hain wo sab ki nazar se dilon ka hal

andar se kaun kya hai sab un ki nazar mein hai

kyun ho raha hai tajziya-e-jaur-e-narawa

taswir ka ye rukh bhi kisi ki nazar mein hai

yaro shikar waqt hun ya asman shikar

jo kuchh bhi hun sab ahl-e-nazar ki nazar mein hai

ab kya shikayat rawish dostan karun

ghausi miri kami bhi to meri nazar mein hai