منتشر شہزاد گان دل کا شیرازہ نہ ہو

منتشر شہزاد گان دل کا شیرازہ نہ ہو

کاش یاروں کی ہنسی فتنوں کا غمازہ نہ ہو

اب وہ سونے کا سہی لیکن مرے کس کام کا

جس مکاں میں کوئی کھڑکی کوئی دروازہ نہ ہو

وہ جواں خون اور اس پر نشہ دیدہ وری

کیا کریں وہ بھی جو میرے غم کا اندازہ نہ ہو

یاد ہے کچھ تم نے کل خاکہ اڑایا تھا مرا

پھول سی آنکھوں میں شبنم کل کا خمیازہ نہ ہو

پھر جنوں کیوں کر سجے دنیا کو کیسے رنگ دے

باعث تحریک اگر یاروں کا آوازہ نہ ہو

کاش میرے غم کا سایہ بھی رہے اپنوں سے دور

کاش اب یکجا مری یادوں کا شیرازہ نہ ہو

آ گلے ملنے سے پہلے کیوں نہ مل کر دیکھ لیں

دل کے تہہ خانے میں کوئی چور دروازہ نہ ہو

وہ تو مردہ ہیں انہیں احساس کی خوشبو سے کیا

اپنے انداز نظر کا جن کو اندازہ نہ ہو

کاش اے غوثیؔ زمانے بھر کا بچپن لوٹ آئے

سب کے چہروں پر حقیقی نور ہو غازہ نہ ہو

muntashir shahzad gan-e-dil ka shiraza na ho

kash yaron ki hansi fitnon ka ghamaza na ho

ab wo sone ka sahi lekin mire kis kam ka

jis makan mein koi khirki koi darwaza na ho

wo jawan khun aur us par nasha dida wari

kya karen wo bhi jo mere gham ka andaza na ho

yad hai kuchh tum ne kal khaka uraya tha mira

phul si ankhon mein shabnam kal ka khamyaza na ho

phir junun kyun kar saje duniya ko kaise rang de

bais-e-tahrik agar yaron ka awaza na ho

kash mere gham ka saya bhi rahe apnon se dur

kash ab yakja miri yadon ka shiraza na ho

a gale milne se pahle kyun na mil kar dekh len

dil ke tah khane mein koi chur darwaza na ho

wo to murda hain unhen ehsas ki khushbu se kya

apne andaz-e-nazar ka jin ko andaza na ho

kash ai ghausi zamane bhar ka bachpan laut ae

sab ke chehron par haqiqi nur ho ghaza na ho