اب تو خود سے بھی کچھ ایسا ہے بشر کا رشتہ

اب تو خود سے بھی کچھ ایسا ہے بشر کا رشتہ

جیسے پرواز سے ٹوٹے ہوئے پر کا رشتہ

کوئی کھڑکی بھی نہیں اب تو جو باقی رکھتی

میرے گھر سے مرے ہم سایے کے گھر کا رشتہ

تم فرشتے ہی سہی نظریں نہ بدلو یارو

کیا فرشتوں سے نہیں کوئی بشر کا رشتہ

موڑ آنے دو ابھی سامنے آ جائے گا

کیا ہے آپس میں شریکان سفر کا رشتہ

تو مرے چاک گریباں کو نیا سورج دے

جوڑ جاؤں میں دھندلکوں سے سحر کا رشتہ

میرے ہاتھوں کی لکیریں یہ بتاتی ہیں مجھے

پتھروں ہی سے رہے گا مرے سر کا رشتہ

سب کے چہروں کی خراشیں ہیں نظر میں غوثیؔ

آئنوں سے ہے دل آئنہ گر کا رشتہ

ab to khud se bhi kuchh aisa hai bashar ka rishta

jaise parwaz se tute hue par ka rishta

koi khirki bhi nahin ab to jo baqi rakhti

mere ghar se mire ham saye ke ghar ka rishta

tum farishte hi sahi nazren na badlo yaro

kya farishton se nahin koi bashar ka rishta

mor ane do abhi samne a jaega

kya hai apas mein sharikan safar ka rishta

tu mire chak-e-gareban ko naya suraj de

jor jaun main dhundalkon se sahar ka rishta

mere hathon ki lakiren ye batati hain mujhe

pattharon hi se rahega mire sar ka rishta

sab ke chehron ki kharashen hain nazar mein ghausi

ainon se hai dil-e-aina gar ka rishta