اب زندگی کا کوئی سہارا نہیں رہا

اب زندگی کا کوئی سہارا نہیں رہا

سب غیر ہیں کوئی بھی ہمارا نہیں رہا

اغیار کی نظر میں رہے مثل خار ہم

اب جینا جاگنا بھی ہمارا نہیں رہا

صوبائی عصبیت نے کھلائے کچھ ایسے گل

اب بھائی بھائی کا بھی سہارا نہیں رہا

اب تو ہماری ناؤ ہے طغیانیوں کے بیچ

نزدیک و دور کوئی کنارا نہیں رہا

خون جگر سے سینچا تھا ہم نے جو اک شجر

ہاں اب تو وہ شجر بھی ہمارا نہیں رہا

چن چن کے تنکے ہم نے بنایا تھا آشیاں

یہ کیا غضب وہ گھر بھی ہمارا نہیں رہا

ماضی کی کچھ حسین سی یادیں ہی رہ گئیں

آنکھوں میں اور کوئی نظارہ نہیں رہا

اہل چمن یہ کہتے ہیں آگے بڑھوں غزلؔ

اب کوئی حق چمن یہ تمہارا نہیں رہا

ab zindagi ka koi sahara nahin raha

sab ghair hain koi bhi hamara nahin raha

aghyar ki nazar mein rahe misl-e-khar ham

ab jina jagna bhi hamara nahin raha

subai asabiyat ne khilae kuchh aise gul

ab bhai bhai ka bhi sahara nahin raha

ab to hamari nao hai tughyaniyon ke bich

nazdik-o-dur koi kinara nahin raha

khun-e-jigar se sincha tha ham ne jo ik shajar

han ab to wo shajar bhi hamara nahin raha

chun chun ke tinke ham ne banaya tha ashiyan

ye kya ghazab wo ghar bhi hamara nahin raha

mazi ki kuchh hasin si yaden hi rah gain

ankhon mein aur koi nazara nahin raha

ahl-e-chaman ye kahte hain age barhun ghazal

ab koi haq chaman ye tumhara nahin raha