Arooz is now on the App Store, for iPhone and iPad. Download →

All poetry

ان نگاہوں کو عجب طرز کلام آتا ہے

Habeeb Ahmad Siddiqui (b. 1908)

ان نگاہوں کو عجب طرز کلام آتا ہے

ایسا لگتا ہے بہاروں کا پیام آتا ہے

مرحلہ ہوتا ہے جب دار و رسن کا درپیش

قرعۂ فال ہم ایسوں ہی کے نام آتا ہے

اے مرے ناصح مشفق کبھی یہ بھی سوچا

کون دنیا میں خوشی سے تہہ دام آتا ہے

بادہ نوشی میں بھی ہے کیف سکوں بخش مگر

ہائے وہ کیف جو بے منت جام آتا ہے

اپنی ہنستی کا بھی احساس جہاں ہو نہ سکے

عالم ہوش میں اک وہ بھی مقام آتا ہے

پیش دستی ہے خرابات جہاں کا دستور

تکتے رہنے سے کہیں ہاتھ میں جام آتا ہے

اہل ہمت کے حسیں خوابوں کی نکلی تعبیر

ابن آدم کو ستاروں کا سلام آتا ہے