دنیا کو روشناس حقیقت نہ کر سکے

دنیا کو روشناس حقیقت نہ کر سکے

ہم جتنا چاہتے تھے محبت نہ کر سکے

سامان گل فروشیٔ راحت نہ کر سکے

راحت کو ہم شریک محبت نہ کر سکے

یوں کثرت جمال نے لوٹی متاع دید

تسکین تشنہ کامئ حیرت نہ کر سکے

اب عشق خام کار ہی ارماں کو دے جواب

ہم ان کو بیقرار محبت نہ کر سکے

بے مہریوں سے کام رہا گو تمام عمر

بے مہریوں کو سہنے کی عادت نہ کر سکے

کچھ ایسی التفات نما تھی نگاہ دوست

ہوتے رہے تباہ شکایت نہ کر سکے

ناکامیاں تو فرض ادا اپنا کر گئیں

ہم ہیں کہ اعتراف ہزیمت نہ کر سکے

فخر مناسبت میں ترا نام لے لیا

ہم خود ہی پردہ دارئ الفت نہ کر سکے

ہر چند حال دیدہ و دل ہم کہا کئے

تشریح کیفیات محبت نہ کر سکے

افلاک پر تو ہم نے بنائیں ہزارہا

تعمیر کوئی دہر میں جنت نہ کر سکے

ہمسائیگئ زاہد بد خو کے خوف سے

پروردگار تیری عبادت نہ کر سکے

duniya ko rushanas-e-haqiqat na kar sake

ham jitna chahte the mohabbat na kar sake

saman-e-gul faroshi-e-rahat na kar sake

rahat ko ham sharik mohabbat na kar sake

yun kasrat-e-jamal ne lauti mata-e-did

taskin-e-tishna kami-e-hairat na kar sake

ab ishq kham kar hi arman ko de jawab

ham un ko beqarar-e-mohabbat na kar sake

be mahriyon se kam raha go tamam umr

be mahriyon ko sahne ki adat na kar sake

kuchh aisi iltifat numa thi nigah-e-dost

hote rahe tabah shikayat na kar sake

nakamiyan to farz ada apna kar gain

ham hain ke etiraf hazemat na kar sake

fakhr-e-munasabat mein tira nam le liya

ham khud hi parda dari-e-ulfat na kar sake

har chand hal dida-o-dil ham kaha kiye

tashrih kaifiyat-e-mohabbat na kar sake

aflak par to ham ne banaen hazarha

taamir koi dahr mein jannat na kar sake

hamsaigi-e-zahid bad khu ke khauf se

parwardigar teri ibadat na kar sake