کچھ بھی دشوار نہیں عزم جواں کے آگے

کچھ بھی دشوار نہیں عزم جواں کے آگے

آشیاں بنتے گئے برق تپاں کے آگے

زندگی نغمۂ دلکش ہے مگر اے ناداں

تو نے سیکھا ہی نہیں آہ و فغاں کے آگے

قصۂ بزم طرب تذکرۂ موسم گل

خوب ہیں یوں تو مگر سوختہ جاں کے آگے

ہم ہیں اور فصل خزاں فصل خزاں ہے اور ہم

ہم سے کیا پوچھتے ہو فصل خزاں کے آگے

دسترس عقل کی ہے سرحد ادراک سہی

منزلیں اور بھی ہیں وہم و گماں کے آگے

زحمت یک نگہ لطف کبھی تو اے دوست

ہم کو کہنا ہے بہت لفظ و بیاں کے آگے

یوں تو دوزخ میں بھی ہنگامے بپا ہیں لیکن

پھیکے پھیکے سے ہیں آشوب جہاں کے آگے

kuchh bhi dushwar nahin azm-e-jawan ke age

ashiyan bante gae barq-e-tapan ke age

zindagi naghma-e-dilkash hai magar ai nadan

tu ne sikha hi nahin ah-o-fughan ke age

qissa-e-bazm-e-tarab tazkira-e-mausam-e-gul

khub hain yun to magar sokhta jan ke age

ham hain aur fasl-e-khizan fasl-e-khizan hai aur ham

ham se kya puchhte ho fasl-e-khizan ke age

dastaras aql ki hai sarhad-e-idrak sahi

manzilen aur bhi hain wahm-o-guman ke age

zahmat-e-yak nigah-e-lutf kabhi to ai dost

ham ko kahna hai bahut lafz-o-bayan ke age

yun to dozakh mein bhi hangame bapa hain lekin

phike phike se hain ashob-e-jahan ke age