یوں تبسم ریز ہے دل چشم خنداں دیکھ کر

یوں تبسم ریز ہے دل چشم خنداں دیکھ کر

جیسے دریا مسکرائے ماہ تاباں دیکھ کر

بارگاہ ناز میں سر کو جھکانا ہی پڑا

حسن کی رنگینیوں کو جزو ایماں دیکھ کر

ان بتوں کے عشوۂ رنگیں کی رنگیں شوخیاں

التفات خاص ہے مجھ کو مسلماں دیکھ کر

گو نہ تھے ناآشنائے رسم و راہ دلبری

پھر بھی ہم کھوئے گئے چشم پشیماں دیکھ کر

زندگی میں قوت بالیدگی آتی گئی

ہر ادائے حسن میں اک راز پنہاں دیکھ کر

حسن کی معصومیت سے دل کو ہے امید لطف

زیر لب خنداں ہے کوئی دل کا ارماں دیکھ کر

بے دلی نے توڑ ڈالے رنگ و بو کے سب طلسم

کیا کرے کوئی بہار صد گلستاں دیکھ کر

yun tabassum rez hai dil chashm-e-khandan dekh kar

jaise dariya muskurae mah-e-taban dekh kar

bargah-e-naz mein sar ko jhukana hi para

husn ki ranginiyon ko juzw-e-iman dekh kar

un buton ke ishwa-e-rangin ki rangin shokhiyan

iltifat-e-khas hai mujh ko musalman dekh kar

go na the naashna-e-rasm-o-rah-e-dilbari

phir bhi ham khoe gae chashm-e-pasheman dekh kar

zindagi mein quwwat-e-balidagi ati gai

har ada-e-husn mein ik raz-e-pinhan dekh kar

husn ki maasumiyat se dil ko hai ummid-e-lutf

zer-e-lab khandan hai koi dil ka arman dekh kar

be dili ne tor dale rang-o-bu ke sab tilism

kya kare koi bahar-e-sad gulistan dekh kar