Arooz is now on the App Store, for iPhone and iPad. Download →

All poetry

اے دل یہ سعیٔ ضبط کہیں رائیگاں نہ ہو

Habeeb Ahmad Siddiqui (b. 1908)

اے دل یہ سعیٔ ضبط کہیں رائیگاں نہ ہو

ڈرتا ہوں پھر وہ دشمن جاں مہرباں نہ ہو

کوئی بتائے ایسی نظر کو میں کیا کہوں

جو رونق حیات ہو تسکین جاں نہ ہو

بے اختیار جھکنے لگی کیوں جبین شوق

اس دشمن وفا کا یہی آستاں نہ ہو

چھیڑا ہے میں نے قصۂ موسیٰ و کوہ طور

اس کو ہے وہم یہ بھی مری داستاں نہ ہو

حیراں ہوں کیسے چشم تمنا نے کی بیاں

وہ ایک کیفیت جو رہین بیاں نہ ہو

میں اور اس نگاہ کرم پر نہ جاں دوں

یہ وہم تھا کہ وہ بھی پئے امتحاں نہ ہو

خواہش یہ ہے کہ نذر کروں یہ متاع دل

پھر سوچتا ہوں ایک نظر کا زیاں نہ ہو

ہے اک ادائے حسن حجاب نظر فروز

اس پردۂ بہار میں کوئی نہاں نہ ہو

محرومیوں نے رنج کو راحت بنا دیا

اب تلخیٔ حیات بھی شاید گراں نہ ہو