وہ درد عشق جس کو حاصل ایماں بھی کہتے ہیں

وہ درد عشق جس کو حاصل ایماں بھی کہتے ہیں

سیہ بختوں میں اس کو گردش دوراں بھی کہتے ہیں

جو آغوش حیا میں ایک دل آویز نشتر ہے

اسی موج نظر کو گلشن خنداں بھی کہتے ہیں

حجابات نظر جلووں کی بے باکی سے کیا اٹھیں

محبت کی نظر کو دیدۂ حیراں بھی کہتے ہیں

نہ کھلوائیں زباں اچھا یہی ہے حضرت زاہد

کہ اس ترک طلب کو حسرت عصیاں بھی کہتے ہیں

کسی کے واسطے سرمایۂ دنیا و دیں ٹھہریں

وہی نظریں جنہیں غارت گر ایماں بھی کہتے ہیں

جو دل معمورۂ صد حسرت و یاس و تمنا ہے

تعجب ہے اسی کو خانۂ ویراں بھی کہتے ہیں

غلط انداز سی نظریں تبسم بے نیازانہ

تغافل کیشیوں کو دعوت ارماں بھی کہتے ہیں

جہان آب و گل کو جس نے ذوق زندگی بخشا

اسے اے حضرت ناصح دل ناداں بھی کہتے ہیں

ہے جس کے دم سے دنیائے محبت جنت ارماں

اسی جان طرب کو فتنۂ دوراں بھی کہتے ہیں

wo dard-e-ishq jis ko hasil-e-iman bhi kahte hain

siyah bakhton mein us ko gardish-e-dauran bhi kahte hain

jo aghosh-e-haya mein ek dil awez nashtar hai

isi mauj-e-nazar ko gulshan-e-khandan bhi kahte hain

hijabat-e-nazar jalwon ki be baki se kya uthen

mohabbat ki nazar ko dida-e-hairan bhi kahte hain

na khulwaen zaban achchha yahi hai hazrat-e-zahid

ke is tark-e-talab ko hasrat-e-isyan bhi kahte hain

kisi ke waste sarmaya-e-duniya-o-din thahren

wahi nazren jinhen gharat gar-e-iman bhi kahte hain

jo dil mamura-e-sad hasrat-o-yas-o-tamanna hai

taajjub hai usi ko khana-e-wiran bhi kahte hain

ghalat andaz si nazren tabassum be niyazana

taghaful keshiyon ko daawat-e-arman bhi kahte hain

jahan-e-ab-o-gul ko jis ne zauq-e-zindagi bakhsha

use ai hazrat-e-naseh dil-e-nadan bhi kahte hain

hai jis ke dam se duniya-e-mohabbat jannat-e-arman

usi jan-e-tarab ko fitna-e-dauran bhi kahte hain