Arooz is now on the App Store, for iPhone and iPad. Download →

All poetry

اس کا تو غم نہیں دل دیوانہ جل گیا

Habeeb Ahmad Siddiqui (b. 1908)

اس کا تو غم نہیں دل دیوانہ جل گیا

ظالم یہ غم ہے تیرا صنم خانہ جل گیا

بیداد رشک سے دل دیوانہ جل گیا

صد حیف ہم نہ جل گئے پروانہ جل گیا

شاید صفائے حسن میں مضمر تھیں رنجشیں

آغوش التفات میں پروانہ جل گیا

ساقی کی چشم ناز سے نسبت ہے کیا اسے

بس اک نگاہ گرم میں پیمانہ جل گیا

ہنگامۂ حیات ہوا ختم اس کے ساتھ

اب کوئی کیا جئے دل دیوانہ جل گیا

آتش سرشت شمع ہے یا ہے عتاب حسن

ہم اتنا جانتے ہیں کہ پروانہ جل گیا

تیرے کرم سے دل پہ جو گزری وہ کیا کہیں

صہبائے آتشیں سے یہ پیمانہ جل گیا