ہوش و ہمت آزما شان تجمل کیوں نہیں

ہوش و ہمت آزما شان تجمل کیوں نہیں

وہ کسی کا آشنایانہ تغافل کیوں نہیں

ضبط کی تلقین اظہار تمنا کے لئے

ہوش کھونے کے لئے شرط تحمل کیوں نہیں

عندلیب خود نگر کیوں رات دن آہ و بکا

احترام جذبۂ خودداریٔ گل کیوں نہیں

شاد ہو محبوب تو ناشاد کوئی کس لئے

خندۂ گل باعث تسکین بلبل کیوں نہیں

ڈھونڈھتی ہے آنکھ پھر وہ سعیٔ بیگانہ وشی

دعوت ارماں بہ انداز تغافل کیوں نہیں

شرم کا لے کر سہارا وہ نظر اٹھی تو کیا

یہ شرار برق آزاد توسل کیوں نہیں

جو نگاہیں صرف تاراج شعور و ہوش تھیں

آج وہ غارت گر صبر و تحمل کیوں نہیں

جام خالی ہو تو رنگینی کو اس کی کیا کریں

بادۂ گلفام سے پر ساغر گل کیوں نہیں

وہ سکوں وہ آشتی وہ سر خوشی پائیں کہاں

زندگی تصویر فردوس تخیل کیوں نہیں

hosh-o-himmat azma shan-e-tajammul kyun nahin

wo kisi ka ashnayana taghaful kyun nahin

zabt ki talqin izhar-e-tamanna ke liye

hosh khone ke liye shart-e-tahammul kyun nahin

andalib-e-khud nagar kyun rat din ah-o-buka

ehtiram-e-jazba-e-khuddari-e-gul kyun nahin

shad ho mahbub to nashad koi kis liye

khanda-e-gul bais-e-taskin-e-bulbul kyun nahin

dhundhti hai ankh phir wo sai-e-begana washi

daawat-e-arman ba andaz-e-taghaful kyun nahin

sharm ka le kar sahara wo nazar uthi to kya

ye sharar barq azad tosil kyun nahin

jo nigahen sirf taraj-e-shuur-o-hosh thin

aj wo gharat gar-e-sabr-o-tahammul kyun nahin

jam-e-khali ho to rangini ko us ki kya karen

bada-e-gulfam se par saghar-e-gul kyun nahin

wo sukun wo ashti wo sar khushi paen kahan

zindagi taswir firdaus-e-takhayyul kyun nahin