حد جنوں سے بھی آگے گئے ہیں دیوانے

حد جنوں سے بھی آگے گئے ہیں دیوانے

ملے گی منزل مقصود کب خدا جانے

کئے ہیں تو نے منور دلوں کے کاشانے

ترے وجود سے آباد ہیں صنم خانے

جو تم نہ تھے تو بہاریں خزاں سے بد تر تھیں

تم آ گئے تو چمن بن گئے یہ ویرانے

شب فراق ہجوم غم و الم کے طفیل

تمہاری یاد چلی آئی دل کو بہلانے

تمام عمر رہی یوں ہی چاک دامانی

چلے ہیں اہل خرد آج مجھ کو سمجھانے

حبابؔ اشک ندامت ہیں ان کی آنکھوں میں

قبول کیجے خلوص و وفا کے نذرانے

had-e-junun se bhi age gae hain diwane

milegi manzil-e-maqsud kab khuda jane

kiye hain tu ne munawwar dilon ke kashane

tire wajud se abad hain sanam khane

jo tum na the to baharen khizan se bad tar thin

tum a gae to chaman ban gae ye wirane

shab-e-firaq hujum-e-gham-o-alam ke tufail

tumhari yad chali ai dil ko bahlane

tamam umr rahi yun hi chak damani

chale hain ahl-e-khirad aj mujh ko samjhane

habab ashk-e-nadamat hain un ki ankhon mein

qubul kije khulus-o-wafa ke nazrane