کیا ہوا رنگینیٔ صبح و مسا باقی نہیں

کیا ہوا رنگینیٔ صبح و مسا باقی نہیں

اپنے ہی گھر میں وہ پہلی سی فضا باقی نہیں

آرزؤں کا کوئی بھی سلسلہ باقی نہیں

مسئلہ یہ ہے کہ کوئی مسئلہ باقی نہیں

آ گیا ہے اب سوا نیزے پہ دیکھو آفتاب

اپنا سایہ بھی زمیں پر زیر پا باقی نہیں

منزلیں آواز دیتی ہیں کہ ہم ہیں منتظر

قافلے والوں میں لیکن حوصلے باقی نہیں

بے محابا اس کے آنے کا نتیجہ یہ ہوا

آئنہ خانے میں کوئی آئنہ باقی نہیں

کتنی مشاقی سے اس نے صاف دو ٹکڑے کئے

جسم میں اب ایک بھی تسمہ لگا باقی نہیں

ہم تو چھوڑ آئے تھے گہرے نقش راہوں میں حبابؔ

وائے حسرت ایک بھی اب نقش پا باقی نہیں

kya hua rangini-e-subh-o-masa baqi nahin

apne hi ghar mein wo pahli si faza baqi nahin

arzuon ka koi bhi silsila baqi nahin

masala ye hai ke koi masala baqi nahin

a gaya hai ab siwa neze pe dekho aftab

apna saya bhi zamin par zer-e-pa baqi nahin

manzilen awaz deti hain ke ham hain muntazir

qafile walon mein lekin hausle baqi nahin

be muhaba us ke ane ka natija ye hua

aina khane mein koi aina baqi nahin

kitni mashshaqi se us ne saf do tukre kiye

jism mein ab ek bhi tasma laga baqi nahin

ham to chhor ae the gahre naqsh rahon mein habab

wae hasrat ek bhi ab naqsh-e-pa baqi nahin