سوز و گداز و جذب و اثر کون لے گیا

سوز و گداز و جذب و اثر کون لے گیا

ہم سے متاع درد جگر کون لے گیا

کیا ہو گیا ہے گردش دوراں تو ہی بتا

حسن و جمال شام و سحر کون لے گیا

شوریدگیٔ عشق کی لذت کہاں گئی

سودا تھا جس میں تیرا وہ سر کون لے گیا

منزل کی سمت بڑھتے نہیں کس لئے قدم

اے دل متاع عزم سفر کون لے گیا

دن میں حریم ناز کے جلوے تھے سب نہاں

شب میں ردائے نجم و قمر کون لے گیا

چرچے تھے علم و فضل کے دنیا جہان میں

گنجینہ ہائے علم و ہنر کون لے گیا

جبریل کے بھی جلتے ہیں پر جس جگہ حبابؔ

اس جا پہ خاک پائے بشر کون لے گیا

soz-o-gudaz-o-jazb-o-asar kaun le gaya

ham se mata-e-dard-e-jigar kaun le gaya

kya ho gaya hai gardish-e-dauran tu hi bata

husn-o-jamal-e-sham-o-sahar kaun le gaya

shoridagi-e-ishq ki lazzat kahan gai

sauda tha jis mein tera wo sar kaun le gaya

manzil ki samt barhte nahin kis liye qadam

ai dil mata-e-azm-e-safar kaun le gaya

din mein harim-e-naz ke jalwe the sab nihan

shab mein rida-e-najm-o-qamar kaun le gaya

charche the ilm-o-fazl ke duniya jahan mein

ganjina ha-e-ilm-o-hunar kaun le gaya

jibril ke bhi jalte hain par jis jagah habab

is ja pe khak pae bashar kaun le gaya